新年假期完結,, 終於要返工了。
同時都因為紅日完結,, 我可以去睇醫生喇…..
睇開既醫生終於都放完假了!!
其實發現懷孕之後,, 第一件事就係要去診所睇醫生,, 拎懷孕證明,,
一黎要黎通知老細,, 二黎要黎去醫院排期。
加上公立醫院多人排,, 所以越早去排越好!!
不過我發現懷孕果日咁岩年初一,, 所以只好等公假完結了。
而且我個病實在係拖極都唔好,, 越拖越辛苦…..
晚晚都會鼻塞醒,, 好難頂。
所以拎證明既時候順便配埋藥啦!!
結果都係要屈服………….
去診所度拎證明其實check個方法都係同自己check一樣…
醫生比支驗孕棒我,, 叫我去廁所check,,
發現呈陽性結果 (2條線),, 就手寫張證明比我去排期,, that all。
一起身發現失埋聲…. 唔通D藥將D菌迫哂出黎?! 哈哈!!
結果今日請左病假……
一邊食藥一邊又好擔心有咩影響….
雖然醫生話係好安全,, 比孕婦食既藥係劑量好細…
不過藥始終都係藥丫嘛……
其實真係好唔想食,, 不過D菌留在身體入面咁耐都唔係好事….
唯有希望一食就好啦….
以後都係著多2件,, 寧願熱都唔好凍親….
以前病就會覺得冇咩所謂,, 病咪病囉,, 頂到咪照返工,, 頂唔到咪請假囉…
而家真係會憂心好多,, 唔係擔心自己,, 係擔心另一個生命…
懷孕書都有提及第4周至第6周對BB的發展黎講真係好重要的!!
(可留意「藥物」果一欄!)
所以懷孕真係要及早發現,, 唔好比自己食錯野OR食左D唔應該食既藥物。
其實呢一排都keep住冇咩安全感既感覺….
我仲差不多隔日就搵D驗孕試紙去驗….
可能係因為我其實冇出現過懷孕既徵狀…
由發現有左之後,, 我冇嘔過,, 口味冇轉過,, 亦都冇其他野特別唔同…
只係日日都會有輕微的子宮痛,, 同胸痛,,
仲係會偶然覺得件事好唔實在… 好驚BB其實唔存在…..
好神經質。
其實一心都係諗住呢個星期六日,, 等Congo都放假就陪我去醫院排期,,
不過見今日反正都請左病假,, 咁不如去政府醫院度排埋啦!!
我最後揀左o係伊利沙伯醫院做檢查同生BB,,
之前我都上網睇左好多人對唔同醫院既評價,, 要幾有好好既都有好衰既,,
發現正評最多都係伊利沙伯同廣華…
最後我揀左伊利沙伯,, 因為始終都係大醫院,, 加上老公同老公家姐都係果度出世,, 會有信心好多!!
打去伊利沙伯度問而家黎排期最快幾時可以黎做例行檢查??
佢地話產檢已經排到6月!?!??!?!?
頂!!!! 早知一早黎啦!!! 如果唔係果幾日紅日阻一阻,, 我早一個星期去可能個情況會好少少…………
所以話,, 有左之後第一件事就係去拎證明同埋排期!! 真係唔好拖……
好啦打完電話即刻出門口,,
(因為病, 所以包到咁...)
結果常規既產檢真係要排到六月…. 姑娘叫我如果唔放心可以每個月去私家check下…
不過驗唐氐綜合症同抽血果D都幫我排到三月可以黎做埋!!生仔亦到留了床位!! 終於排左期, 安心哂!!
對住呢一堆未接觸過既文件,, 心入面又緊張,, 又開心,,
「產婦資料」呢一欄,, 話我知我既懷孕旅程已經開始了,, 我已經係一個準媽媽喇!!
