WEEK 11 - 12 : 1st產前講座 + 生日。

最近老公每晚都彈結他,, 雖然音樂胎教可能早左少少,,

不過而家keep住彈都應該嫁喇,, 而家成日都彈到甩頭甩尾...

到時等BB真係聽到既時候應該會彈得好聽過而家哈哈!!

有日o係個袋到搵到呢一包止嘔藥... 係我第一次睇私家醫生配定比我,,

話以防萬一喎...

結果好感恩地我呢3個月都冇嘔過一次,, 陀得好舒服,, 睇黎呢包野可以掉左佢lu!!

最近不停收到「媽媽會」寄黎的入會禮物同資訊,, 所以入呢D會真係好重要呢!!

2014年3月19日 (三) – week 11 + 6 days (懷孕第83天)

今晚同另一班好朋友食生日飯,, 因為約既時候我沒表明已懷孕,,

結果大家揀左放題……哈哈!!

我有好多野都唔食得,, 不過唔緊要,, 大家聚埋一齊先最重要。

呢一晚我亦宣佈懷孕呢個消息,, 大家都好為我開心,,

身邊的天使實在太多太多了。

2014年3月22日 (六) – week 12 + 2 days (懷孕第86天)

第一次聽產前講座。

雖然懷孕才3個月就聽好似早了點,, 不過知多D都冇壞,,

而且我怕後期肚再大就唔方便常外出了。

講座在尖咀一間酒店進行,, 佢一早已經安排好座位,,

我地好好彩,, 個位算前亦好正中,, 每一對夫婦都有一個假BB做實習,, 仲有紙筆做筆記。
呢個講座係由「惠氏媽媽會」舉辦,, 我覺得呢個係我加埋期後聽咁多講座入面最好的!!

講座一半關於孕婦要吸收的營養,,

原來豬骨湯的鈣質係少到接近0,,, 唔係大家想像中咁補鈣….

另一半關於幫BB沖涼換片,, 要用假BB黎練習,,

2個都雞手鴨腳….. 邊做邊笑..... 

見到佢咁認真學,, 其實我心入面係好感動。

成功!! 哈哈!!

呢個係聽完講座送的禮品!!

聽完還早,, 就去歷史博物館打了個轉。

我好中意去歷史博物館,, 因為我好中意D懷舊野。

今晚食飯前我忍唔到口… 食左懷孕來第一次咁大杯既雪糕。
呢個MAMI真唔乖, 哈哈!!

最近肚皮成日都好痕,, 忍唔到手成日都去抓,, 結果起左好多紅點….

今日買左2支妊娠膏,, 

其實有左3個月先用係有少少遲…我見好多人話2個月都要開始用了...

希望仲趕得切啦….

2014年3月23日 (日) – week 12 + 3 days (懷孕第87天)

2X歲生日,, 哈哈!!

上年去左海洋公園,, 今年決定去山頂行下。

由於太hea... 出到中環都已經12點幾... 極多人!!!

未試過上山頂都要打蛇餅... 而且聽到既都唔係廣東話....

香港真係淪陷了.......

排得隊黎攪到成2點幾先上到去...

去左蠟像館,, 因為最近做緊優惠生日有一個免費一個半價。

不過年幾之前先黎過,, 所以個幾中就行完.... 

見今日特別日子,, 就整我地第一次既手蠟....

結果整完拎返屋企幾日之後...曬溶左..... 連遺照都冇幫佢影一張.... 好傷心....

hea左一陣就返娘家喇,, 今晚返娘家食生日飯!

收到妹妹送的泵奶器同弟弟送的BB鞋做生日禮物!!

可能因為太耐冇見BB,, 加上又覺得自己個肚唔多大,,
所以成日都冇D莫名又無謂的擔心,,

快D到聽日啦,, 聽日就可以照超聲見到BB喇!!

已滿3個月喇!! 終於可以o係facebook度宣佈懷孕,,

收到好多好多祝福!! 好warm好開心!!

最後送上今期大肚相。

肚腩??? BB??? 哈哈哈!!!